China ramah hun engemawchen rawng kan bawl hnuin nikum 2007 June ni 22 khan kan awmna khua Xi’an kan chhuah san a. August 2007-ah BCM Headquarters-a kan hotute hnenah in report-in M&E Committee-ah China rama rawngbawlna chungchang leh rawngbawl zel dan tur report kan pe bawk a. Kan hotute’n BCM College hawn thar HATIM-ah kum khat chhung thawk turin min ti a. August ni 16, 2007 atang khan chu hna chu zawmin kan nupa-in a hmunah kan awm chilh a. Kawng engkimah Principal leh zirtirtu, leh zirlaite hmangaihna leh duhsakna kan dawng a, a ropui kan tiin kan lawm hle. HATIM hian potential a nei tha hlein kan hria a, Pathianin nasa takin mal a sawm ang a, a ram zauna’n a hmang zel ang tih kan ringin kan beisei tlat a ni.
Kal rawh u
In lamah leh Zoramah thawh tur leh rawngbawlna pawimawh tak tak te kan hmuin kan thinlungin a hrereng mai. Chutianga Pathianin a kohna hmuna thahnemngai taka thawktute kan hmu a, a ropui kan ti. Chutiang a nih reng lai chuan Pathianin tuna kal tura min kohna hmun chu China a la ni reng mai. Hmun hrang hrangah Kohhran leh mimal, rawngbawla kan chhuah leh theihna tura min tawngtai saktu te au thawm a hrereng a, BCM kaltlangin South East Asia-a rawngbawlna kawng a lo hawng leh ta a. Keini nupa pawh midang tam tak, Pathian tana inpe tak tak an awm laiin khawngaihna rawngbawl hna min chan tir leh a, China ramah a rawngbawl turin kan let leh ta. A khawngaihna kan chanah kan lawm em em a ni.
Lawmthu
Chinese Visa hmuh a harsa hle mai. China rama kan thawhna University atanga thawk tura sawmna kan hmuh vek tawh hnuah pawh kan visa kan buaipui rei hle a. Kum dangah hetiang
harsatna hi kan tawk ngai lo. New Delhi-ah Pu B.Vanlalvawna, IFS chuan hun nei chep em em chung leh buai tak chungin rawngbawlna a ni tih hriain a theih tawpin min buai pui a. Chinese Embassy-ah vawi nga (5) lai form thehlut turin kal a tul hial a. Min duhsakna leh min buaipui avangin a chungah kan lawm hle a, Pathianin tisa leh thlarau malsawmna tam tak a vur kan dilsak a ni. New Delhi-a tum lawk loh taka ni riat (8) kan cham chhungin Pu Lalchuangliana te chhungkuain Pathian rawngbawlna avangin Concern Guest House, nuam tak maiah a thlawn vekin min lo mikhualin min thlen tir a. Chu mai bakah an theihna kawng hrangah phur tak leh hlim tak maiin min buai pui a. An inpekna hian nasa takin min tiphurin min fuih a, an chungah Pathian hmingin lawmthu kan sawi tak meuh meuh a ni.
Mizorama kan awm chhungin Kohhran engemawzatah rawngbawlna chanchin te kan sawi thei a, lawm taka min lo dawngsawng a, min tawngtaisaktute hnenah lawmthu kan sawi a. Sum leh pai leh kawng hrang hranga ui lova min pe a, min tanpuitu te avang pawhin lawm thu kan sawi mawlh mawlh bawk a ni.
China kan lut leh ta
August ni 20, 2008 khan Aizawl atangin Delhi kan pan a. New Delhi-ah Visa buaipuiin kan cham ta zek a. August ni 28 khan Shanghai panin kan thlawk chhuak ta chauh a ni. Shanghai Pudong
International Aiport-ah China sana-a zan dar 8:00 (10:30pm IST) ah kan thleng a. Pathian hnenah mite’n min duhsak theihna turin kan dil a, Immigration-ah buaina engmah nei lovin awlsam em emin kan lut a. Kan lehkhabu ken luh that ngam loh, kan hnutchhiah tak ngawtte kha lo keng tel ila tha tur hi a nia, kan bag an check hauh si lova! Kan Chinese thiannu Rachel-i in panin Maglev rel-ah darkar khata kilometre 430 vela chakin kan tlan leh ta vuai vuai a. Zan dar 11 velah a in kan thleng a, hlim em emin min lo lawm a, mahni in thleng ta ang hialah kan in ngai a ni. Shanghai-ah hian zan hnih kan riak a, August ni 30 khan Xi’an panin kan thlawk a, aiport-ah kan university-in min lo hmuak a. A hmaa kan chenna thin in ngaiah chiah min dah leh a. Pathianin min kohna, kan inah ngei kan let leh ta chu kan thla a ngam hle.
University zirtirna lam
Kumin hian kan University-a Post Graduate zirna hrang hrang an tilian a, zirlai an pung nasa hle. Hemi avang hian zirtirtu pawh an lo mamawh nasa hle mai a. Kan awm hmasak laia ramdangmi zirtirtu 4/5 vel lek awm thin kha 12 lai kan awm ta. Zirlai an tam em avangin Beii pawh kum khat chhung contract sign puiah an ngen lui tlat mai a. Mahse, University-a tawng zir tura inziah luh a duh avangin kum khat chu theiah a inngai lova, semester khat (thla ruk) chhung a zirtir ve leh dawn ta a ni.
Rema hi kan University-a Chinese Saptawng zirtirtute hnenah Linguistics Lecture pe thin turin an ti a, kar tin heng ho hi a zirtir thin a ni. Hei bakah hian College zirlai, English Major zir hote a zirtir bawk ang. Mahni tawkah hna kan ngah dawn viau mai. Inhlawhfa tura kal kan ni lo tih inhriat kha. Kan zirtirna te hi thian tha siamna’n leh rawngbawlna kawng inhawnna a lo nih zel theihna’n min lo dilpui ula. Tin, zirtir thiamna leh finna, Pathian hnen atangin kan mamawh ang zela kan neih theihna’n min dilpui turin kan ngen che u a ni.
Tawng zirna
Chinese tawng thiam tak tak a, anmahni hnenah an tawng ngeia Pathian thu duh tawka kan sawi theihna turin kan bei dawn a. Tawng hi Pathian ta a nih avangin a hnenah thiam theihna a awm a ni tih kan hria a, kan dil a ni. Zirtirtu kan nih avangin tawng zirna class pangaiah kan kal hman ve lova. Tunah hian Puii zirlai hlui pakhat Charles-a kan ruai a, Rema hian a hnen atangin tawng a zir tan mek a ni.
Pathian thu zirna
Kan haw hmaa Pathian thu zirna kan neih thin kha chhunzawm leh nghal mai theih pawh kan inbeisei chiah lova. Mahse, kan thiante Tyson-a leh Fiona te nupa khan min lo nghakhlelin, min beisei hle mai a. September ni 7, Pathian ni zan atang khan Pathian thu zirna pawh kan tan leh ta. He hun pawimawh tak hi min hriatpui a, min lo tawngtai pui mawlh mawlh turin kan sawm che u a ni. Kan beiseina leh kan tawngtainaah chuan hemite nupa hi uluk taka Pathian thu zirtir a, anmahni kal tlanga an inah kohhran inpawlkhawmho la din pui a, anmahni leh anmahni Chanchin Tha an inhrilh a, an pun zel hi a ni. Kan thiante dang Jessia leh Francis-a pawhin thu zirna hun hi min lo zawm ve leh ta bawk.
Kan dinhmun leh kan hmathlir:
June-July, 2008 chhung khan thla hnih dawn AICS-ah training-in kan awm a. Jonathan Training Principle leh Kohhran phun leh than dan chungchang (CMM) Pu Andrew-a’n min zirtir kan hlawkpui hle mai. Kan zirna zulzuiin heti hian kan dinhmun leh hmathlirte i han tarlang teh ang:
Hmathlir:
He ram hian Pathian a lo hriat a, communist kulhpui tihchim a lo nih a, Krista Chanchin Tha zalen taka hrilh a nih a, mi bo tam tak Pathian hnenah hruai an nih a, Kohhran chak taka a lo than zel.
Kan Hna:
- Chinese tawng thiam
- Pathian thuzir group siam
- Ring thar tam zawk siam a, anmahni nen mahni kea ding thei In-Kohhran din
- In-Kohhrante’n Kohhran dan tam tak an phun a, an darh zau zel theihna tura thawhpui
- Rawngbawltu dangte an lo luh belh zel theihna tura hmalak
- Kan rilru ang pumi, he rama awm mekte nena thawhho zel
Pathian thu chuan hetihian a ti:
Hnam dang aia in tam avangin LALPAN in chungah a hmangaihna a fuktir a, a thlang che u a ni lova; hnam zawng zawnga hnam tlem ber in ni asin; LALPAN a hmangaih che u avang leh in pi leh pute hnena chhia a lo chham chu hlen a duh avang zawkin asin LALPAN Aigupta lal Pharaoa kut ata kut chak takin bawih ata a tlan chhuah che u ni...In rilrua, 'Heng hnamte hi kan aiin an tam si a, engtin nge kan luhchhuah theih ang?' ti in nih chuan... anni chu hlau suh u.... LALPA in Pathian Chu in zingah a awm si a (Deut. 7:7,8, 17, 18, 21).
Hriatpui tur leh fimkhurna tur:
China ramah rawngbawltute awm phal a nih loh avangin lehkhathawn, chanchinbu, e-mail, chat, phone leh inbiakna reng rengah Pathian thu leh rawngbawlna chanchin Saptawnga sawi rik leh ziahlan a remchang lo. Fimkhur pui kan ngai hle. Tawngtainaa min lo tanpui theihna turin kan chanchin thar hi thlatin thawn chhuah kan tum a, a dawng duhte chuan in e-mail min lo hriattir dawn nia.
