Sawi ve reng reng ang

Roreltua awmte hi Pathian ruat an ni

- Rom 13:1b.

Hunte leh hunbite a ti danglam a: Lalte a sawn bo va, lalte a tungding a

- Daniala 2:21

Sawi ve reng reng a ngai. Inthlan hmain kan tawngtai tlat. Kan dil a, hei hi kan hmu a, kan sawi hi a thiang a ni. "Mahni phu tawk ang zel roreltu kan nei thin" an tih avangin Pathian hnenah kan phu tawk ang min pe tawh lo hram turin ka lo dil ve mial mial a. Kan phu tawk leh kan neih chuan kan ram hian eng kan an phah dawn lo; phu tawk aia sang ngen ngawl taka dil kha a tulin ka hria a ni.

India inthlanpui hnuhnung berah mi tam zawkin BJP an chak leh an ring a, Congress an sawrkar leh ang tih an ring lo. Economy a tha a, ramin kawng hrang hrangin hma a sawn a ni. A lehlamah BJP sawrkar laiin nasa takin ringtute'n nekchepna leh tihduhdahna an tawk a, Gujarat-ah buaina namen lo thleng a, Orissa-ah te pawh. Hindu hovin min nghaisa nasa dawn a nih hi tia mi tam tak an rum laiin Pathianin an sawrkarna chu a paihthla a, "A va mak em!" kan ti a nih kha.

MNF sawrkar-in term hnih chhung sawrkarna an chelh a, mipui duhthlanna a lo chhuak a, an kal a ngai ve leh ta. An tlin zawh tak lohna chhan kawng hrang hrangin a sawi theih ang. Zoramthanga chuan 'sawrkar dinglai nin vang' (incumbency factor) ni berah a ngai a. Ngaihdan dangah corruption nasat lutuk vang tih te, Law and order mumal loh vang, sawrkarin a tih tur a thawk zo lo, etc, etc a awm nawk mai. Heng zawng zawng hian kawng hrang hrangin awmzia an nei vek awm e. Vote thlaktu tam zia leh an kal thatzia enin engemaw kawng zawng tak chuan 'Obama factor' te pawh kan ti ve thei awm e. Mi tam tak, a bikin thalai, khawvel tukverha dak phak chin tawh phawt chu tunhma zawng aiin vote thlak ngei turin a fuih phur ve ngei ngei ang. A hmuna awm lo tan chuan rindan sawi a ni deuh vek mai a, sawi thui vak lovang.

Tun tum inthlana rilrua thil lo langsar tak tak te chu hetihian han sawi thuak thuak dawn ila (ngaihtuahna fim tak pawh ka hmang hman em em bik lo):

Mipui kan fing leh zual tawh: Tunhma zawng aiin mipuiin ram hmangaih nachang kan hre leh zual ta a, kan fing ta zawk niin a lang. Mi tam tak party politics-ah la buai fo mahse, a ngaihna hre chin te hi chuan 'party' ai mahin candidate te enin vote an thlak ta niin a lang. Congress hrim vote lam ai mahin a candidate an chhawp chhuahte an hralh an tla zawk niin a lang.

YMA-in absolute power a hloh deuh em?: Tunhmaa YMA, pawl thianghlim nia kan ngaih thin kha mi engemawzatin politics lama invawrhna 'platform' atan an hmang ta mek niin a lang a. A tir lama politics-a zuang lut te khan an tlin phah a, tunah chuan an tlin phah ta vak lo niin a lang. Thil kan ti chho zel a, kan zir chho zel bawk niin a lang, a tha lam a niin ka ngai.

Mahni thawhchhuah loh pui lo claim a him lem lo: Ram hruaitu lu berin 'Pathian rawngbawltu' nuai khat kan tir dawn tiin a puang dum dum a, Mizoram sawrkarin engtikah mah Pathian rawngbawltu a tir ngai lo. Pathian Kohhrante'n Pathian thu hmuin an tir thin a ni zawk. Sawrkar chu Pathian hmanrua mai a ni.

Vote Bank Politics a reh deuh em?: Chhung leh khat, vua leh vang in vote luih luih kha hmun tam takah chuan a la awm em em ang. Mahse, tlem tlemin a zia chho zel turah ka ngai. Mahse, Chhim khawthlang lamah chi bing in vote-na a la nasa hle tih result atangin a hriat theih. West Tuipui Constituency-a MLA thlan tlin hian a bial a hum hneh hle. He bial atang hian Mizoram MLA inthlan awm tawh reng rengah Mizo pakhat mah an la tling thei lo. Hemi avang hian hmasawnna pawh a 'satel kal' tial tial a, hnuhchhawn ramah a chang chho zel 'ni berin a lang'.

Media role a langsar: Mizorama chanchinbu darhzau ber berte leh Cable TV te'n sawrkar thlak chungchangah role an nei lian hle. Inthlan hma kumah Zoramah kan awm ve a, mipui ngaihdan siam, thlak leh hruai kawngah kan chanchinbu leh electronic media lam an pawimawhin an langsar leh zual hle. A tha zawnga changkanna a ni e.

Inthlan result lamah erawh kan chanchinbu website hote an che muang viau. www.lawrkhawm.com leh www.misual.com te an tangkaiin an fakawm hle. Election Commission website pawh a rintlakin a chhawr nahawm hle mai. Chanchin thar a thlen rual rualin kan lo hre ve zung zung mai.

Opposition an va chau dawn ve!: Shadow Ministers tih vel nei thei khawpin opposition an inhlawmkhawm tha thei ngut ang em? Duh aiin an tlem mah mahin ka hria.

Roreltute hi Pathian ruat an ni: A tawp ber leh a pawimawh berah chuan Pathianin a duh duh hi a tung ding a, a duh duh a paihthla mai thin. Inthlana chak chhan leh chak loh chhan zawng zawng bul ber hi chu Pathian liau liau a ni. 1998 thleng Congress-in ro an rel tawh. Corruption leh zu leh sa leh kawng hrang hranga sualna pawh kan ramin a dai nasa a, mi tam tak an rum thin. Pathianin tunah hian tungdingin 'chance' a lo pe leh ta. A duh zawng leh a zai ngai, amah tih chunga ro an rel loh chuan reiloteah kan ‘mangtha' leh mai ang.

Kan zavai hian khua leh tui tha nih tum ila, mahni theuh hi kan hna theuhah han corrupt lo phawt mai ila ram siam thatna chu kan tan a lo ni reng dawn a ni. Sawrkar thar lo piang tur hi tawngtaina nen chelh ila, anni'n an theih tawpin ram leh hnam thatna turin rinawm takin thawk sela anmahni leh an chhungte ei khawp chu nitinin Pathianin a pe zawk dawn a ni. Kan Pathian Nung tia sawi kur dup lovin a nun ang ngeiin amah tih a pawimawh zel ang.

Hei hi ka 'two cents' worth' chu lo ni rih phawt teh se.